​⚠️ Readers Ke Liye Zaroori Note:

Ye story Maut ka Tohfa Suspense Story ka Part 2 hai.

Agar aap direct is page par aa gaye hain aur aapne is suspense story ka pehla part nahi padha hai, toh plot aur mystery ko poori tarah samajhne ke liye please pehle Part 1 zaroor padh lein.

​🔗 Part 1 Padhne Ke Liye Yahan Click Karein:

Maut ka Tohfa Suspense Story – Part 1

Gas cylinder ka pipeline phat chuka tha, dal ki patili zameen par ulat gayi thi, aur charo taraf sirf jali hui lakdi, pighle hue plastic aur khoon ki boo thi.

Dhamake ka dhuwa jab thoda kam ho gaya, tab rasoi ka nazara rooh kaanp dene wala tha.

Dadi (Devki Devi) rasoi ke us kone mein, jahan woh baithi thi, zameen par bilkul bejaan  padi hui thi. Unki aashirwad dene wali aawaz khamosh ho chuki thi.

Unki saansein kaafi Dheere Dheere chal rahi thi aur unke safed baal khoon aur raakh se san chuke the.

Riya thode dur farsh par giri hui thi. Uska sundar chehra, aur uski chaati ka hissa jal chuka tha.

Uske kaano ke parde is bhayanak blast ke impact se phat chuke the aur use kuch sunai nahi de raha tha, bas ek lagatar ‘beeeep’ ki aawaz uske dimaag mein chal rahi thi.

Woh lagatar khaans rahi thi, kyunki barood ka zehrila dhuan uske phepdon mein ja chuka tha.

​Aur Sameer… Woh counter ke paas hi khoon ke ek bade talab mein leta hua tha. Uska wahi daayan haath, jisse usne dhaaga kheencha tha, puri tarah se jal chuka tha.

Uska seena blast ke jhatke se fat gaya tha, jahan se lagatar gehra lal khoon beh raha tha. Uski har ek saans ek aakhri ladai jaisi thi.

Rajpur Road par chalte hue log aur padosi is bhayanak aawaz ko sunkar Rawat Estate ki taraf daude.

“Arre! Rawat ji ke ghar mein kya hua? Gas phat gayi kya?”

​Log dhuen se bhare darwaze ko todkar andar ghuse. Charo taraf cheekh-pukaar thi. Koi paani phek raha tha, koi ambulance ko call kar raha tha.

Sameer ne apni zindagi ki aakhri taaqat ko batorkar apni aadhi khuli aankhon se zameen par tadapti hui Riya ko dekha. Uske honth bhot mushkil se hile, aawaz bilkul dheemi, dard se bhari aur kaanpti hui nikli:

​”Riya… tum… theek ho..?”

Uske baad, Sameer ki aankhein band ho gayi. Uska haat zameen par bejan gir gaya, aur woh behoshi ke ek gehre, kaale andhere mein chala gaya.

​”Arre, koi paani lao! Jaldi karo, andar aag lagi hai!” ek padosi ne chillate hue kaha.

Ghar ke andar ka nazara tabaahi ki dastaan bayaan kar raha tha. Rasoi se nikalta hua barood ka dhuan ab poore ghar ke corridors mein phail chuka tha.

Do-teen hoshyaar padosiyon ne rasoi mein lage chote-mote aag ke jhonkon par paani phekna shuru kiya, jabki baki log darwaze aur mitti ke dher ko hata kar andar ghusne ki koshish kar rahe the.

Kuch der mein, Rajpur Road par 2 ambulances aur police ki gaadiyon ke siren dur se hi gunjne lage. Sirens ki woh teekhi aawaz Dehradun ki us thandi dopahar ko aur bhi khaufnak bana rahi thi.

​Teeno zakhmiyon ko alag-alag ambulances mein daala gaya.

Paramedics ne ambulance ke andar he Sameer aur Riya ko oxygen masks lagaye aur unke gehre zakhmon par jaldi-jaldi bandage baandhna shuru kiya.

Ambulances Hospital ki taraf poori raftar se daud padi.

Lekin niyati ko kuch aur hi manzoor tha. Blast ke us bhayanak dhamake aur barood ke dhuen ne 82-saal ki dadi (Devki Devi) ke kamzor jism par gehra asar kar diya tha.

Ambulance abhi hospital ke gate tak pahunchi bhi nahi thi ki dadi ki dhadkano ne unka saath chodh diya. Blast ke sadme ki wajah se unhe raste mein hi ek bhayanak cardiac arrest aaya tha.

Jaise he teeno hospital ke emergency ward me pahuch gaye, wahan ke Senior Doctor ne dadi ki pulse check ki, unki aankhon mein torch ki roshni daali, aur bhari aawaz mein sir hila diya.

​”She is brought dead. Blast ke sadme aur jhatke ko inka dil bardaasht nahi kar paya,” doctor ne naram par bheed-bhaad wale corridor mein khade padosiyon ko bataya.

Wahi dusri taraf, Sameer aur Riya ki haalat behad nazook thi. Dono ko turant ventilator par dalkar Critical ICU mein shift kar diya gaya. Hospital ka poora staff afra-tafri mein tha, aur ICU ke bahaar ‘No Entry’ ka board taang diya gaya.

Shalini Rawat us waqt apne college ke principal office mein baithkar agle mahine ke exam schedules aur audit files check kar rahi thi. Tabhi unka phone baja aur padosi ki kaanpti hui aawaz sunkar unke haath se saari official files chhoot kar zameen par gir gayi.

Unka poora jism sunn pad gaya aur woh bina kisi se kuch kahe, ladkhadate kadmon se apni car ki taraf bhaagin aur hospital ke liye nikal gayi.

​Wahi, Ravindra Rawat apni beti ko Delhi drop karne ke baad wapas Dehradun laut rahe the. Unki silver sedan car is waqt Mohand jangal ke us sunsaan, akele aur ghumavdar raaste par thi, jahan dono taraf sirf ghane ped the.

Unka phone jo dashboard par rakha hua tha wo baj utha. Jaise he unhe ghar par hue is haadse aur dadi ki maut ki khabar mili, Unka gala sukh gaya aur aankhon se aansu behne lage. Unhone wahi se gaadi ghumayi aur puri raftar se Hospital ki taraf gaadi bhagane lage.

Shaam ke lagbhag 5 baje, dono maata-pita hospital ke corridor mein mile. Shalini Aunty, jo hamesha ek sakht aur disciplined Principal ke roop mein jaani jaati thi, aaj puri tarah tut chuki thi.

Woh Ravindra Uncle ke gale lag kar rone lagi aur apna bacha kucha hosh kho baithi.

Unka hasta khelta parivar, jiski shaadi ki khushiyan abhi kal hi khatam hui thi, aaj hospital ke is thande aur safed corridor mein maut aur zindagi ki ladai lad raha tha.

Dopahar ke baad, Rajpur Police Station ke Senior Inspector apni puri team ke saath Rawat Estate pahunche. Unhone pure ghar ko charo taraf se peeli crime scene tape (“CRIME SCENE – DO NOT CROSS”) se seal kar diya.

Kuch hi der mein Dehradun ki Forensic Science aur Bomb Disposal Squad ki team bhi wahan pahunch gayi.

Rasoi ke andar ka mahol ek dam dard nak tha. Deewaron par kaala barood chipka hua tha aur hawa mein sulfur aur jale hue gunpowder ki teekhi, chubhne wali boo abhi bhi barkarar thi.

Forensic team ke experts ne sabse pehle rasoi ke gas stove aur cylinder ko check kiya. Cylinder bilkul intact tha, usme se koi leakage nahi thi.

“Sir, yeh gas cylinder ka blast nahi hai. Yeh ek planned attack hai,” Forensic Expert ne Inspector ko bataya.

Experts ne puri rasoi ke malbe ko bariki se channa shuru kiya. Unhone choti-choti chimtiyon me zameen se kuch critical saboot uthaye:

• ​Ek choti jali hui zinc-chloride battery ke avshesh.

• ​Chote-chote LED particles aur ek micro-switch ke jale hue purze.

• ​Khaki cardboard box ke kuch adhe-jale tukde.

Inspector ne apni diary mein note karte hue gehraayi se kaha, “Iska matlab, jaise hi box ka dhaga kheencha gaya, micro-switch ne circuit pura kiya aur battery ne detonator ko trigger kar diya. It’s a sophisticated Parcel Bomb.”

Malbe ki talaash ke dauran, forensic team ko sink ke paas se us khaki box ke upar lagi courier slip ka ek adha-jala hissa mila. Slip par likhi handwriting behad gandi aur bikhri hui thi, par barood ke daagon ke beech se jo naam ubhar kar aa raha tha, use Inspector ne dhyan se padha: “N.K. Sharma, Sector 17, Chandigarh”.

​”Sharma… handwriting kaafi messy hai, par yeh saaf tor par N.K. Sharma hi padha ja raha hai,” Inspector ne kaha.

​Rajpur Inspector ne bina koi samay gawaye turant Chandigarh Police Control Room ko contact kiya aur is address par enquiry karne ko kaha. Unhe laga tha ki shayad koi purani dushmani ya koi aisa dushman hoga jiska pata chal jayega.

Lekin der raat tak Chandigarh Police ki taraf se jo report aayi, usne Dehradun police ke hosh uda diye. Chandigarh Police ne bataya ki Sector 17 mein is naam ka koi vyakti rehta he nahi hai, aur jo house number reference slip par dikh raha tha, woh address puri tarah se farzi tha. Kisi ne jaan-boojhkar police ko bhatkane ke liye yeh farzi naam aur pata likha tha.

​Raat ke 11:30 baj chuke the. Hospital ke corridors mein light dheemi ho chuki thi, aur wahan ek bhaari, ashubh sannaata chha gaya tha.

Rajpur Police Station ke Inspector ICU ke bahaar khade the, unke haath mein forensic report thi. Unka chehra tension se bhara hua tha. Saare shuruaati leads khatam ho chuke the. Sender ka naam fake tha, address fake tha, aur attack itna shandaar tarike se plan kiya gaya tha ki piche koi fingerprint ya surag nahi bacha tha.

“Sir, ab hum kya karenge? Yeh toh puri tarah se ek ‘Blind Case’ ban chuka hai,” junior officer ne dheere se pucha.

​Inspector ne ICU ke kaanch se andar dekha, jahan Sameer lagatar ventilator par saans le raha tha aur uski haalat har guzarte ghante ke saath bigadti ja rahi thi.

“Hum ek bohot he shatir killer ko dhoond rahe hain. Jisne bhi yeh kiya hai, use acche se pata tha ki police ko kaise andhere mein rakhna hai,” Inspector ne bhari aawaz mein kaha.

​Hospital ki dim lights mein, us raat sirf gham, maut ka sannaata aur ek aisi paheli thi jiska koi jawab dur dur tak nazar nahi aa raha tha.

Hospital ke Critical ICU me Sameer apni aakhri aansein gin raha tha.

Doctoron ki ek puri team Sameer ke jism se barood ke tukde nikalne aur uske phephdon mein phaile infection ko rokne ki jaddo jahad mein juti hui thi. Par ventilator par chalti hui saansein har guzarte ghante ke saath dheemi hoti ja rahi thi.

February 25 ki us kaali raat ko, theek 2 baje, ICU ka darwaza khula. Senior Doctor bahaar aaye, unka chehra jhuka hua thha aur unhone apna surgical mask utara. Ravindra Uncle aur Shalini Aunty ek jhatke mein apni kursi se uth kar aage badhe.

​”We are extremely sorry… Hum Sameer ko nahi bacha paaye. Internal bleeding aur blast injury ki wajah se uske multiple organs ne kaam karna band kar diya tha jiski wajahSameer k maut hogayi,”

Doctor ki is ek line ne wahan khade maata pita ki duniya ko hamesha ke liye ujhad diya.

Ravindra Uncle bina kisi aawaz ke deewar ke sahare zameen par baith gaye, unki aankhon se nikalne wale aansu unke muffler par gir rahe the. Shalini Aunty, jo poore shehar mein apni dheet shaksiyat ke liye jaani jaati thi, ek aisi cheekh maari jisse hospital ka woh thanda corridor kaanp utha. Unka eklauta beta, unke ghar ka chirag, is duniya se ja chuka tha.

Rajpur Road sthit Rawat Estate, jahan paanch din pehle shehnaiyan baj rahi thi, ab ek aise shamshan mein badal chuka tha jahan sirf sannata aur maut ki boo baaki reh gay thi.

Dadi aur Sameer, dono ki chitaayein ek saath jali, aur unki raakh ke saath Rawat parivar ki saari khushiyan bhi baha gayi.

Riya ki haalat ko dekhte hue use behtar ilaaj ke liye Dehradun ke Max Hospital mein shift kiya gaya. Uska jism is tabaahi se buri tarah jal chuka tha.

Doctors ki report ke mutabiq, uske seene, pait aur dono haanthon par 40% burn injuries thi.

Sabse ajeeb aur khaufnak baat yeh thi ki haadse ke kai dinon baad bhi uske zakhmon se jale hue gunpowder ki teekhi khushbu aa rahi thi. Blast impact ke kaaran uske kaan ka parda phat chuka tha, jisse use sirf ek lagatar bhari ‘sunsunahat’ sunai deti thi, aur uski aankhon ke aage sab kuch dundhla tha.

Riya lagbhag 25 dinon tak Max Hospital ke isolation ward mein zindagi aur maut ke beech jhulti rahi. Is dauran jab bhi use thoda sa hosh aata, uske honth sirf ek hi naam pukaarte

“Sameer… Sameer kahan hai?”

Uske apne mata-pita aur ICU ke bahaar baithe Ravindra Uncle aur Shalini Aunty ne ek bohot bada aur dardnaak faisla kiya tha. Doctoron ne saaf kaha tha ki agar Riya ko is waqt koi bhi gehra sadma laga, toh uska dil bardaasht nahi kar payega aur uski jaan chali jayegi.

Isliye, har baar jab Riya aankhein kholti, uske Papa apne aansuon ko peete hue jhoot bolte, “Beta, Sameer dusre ward mein hai. Uska ilaaj chal raha hai, tum bas aaram karo.”

Riya un jhooti baaton par yakeen karke dobara behoshi ke andhere mein chali jaati, is baat se bilkul bekhabar ki uska suhaag kab ka ujad chuka hai.

March ke aakhri hafte tak Riya ki haalat mein thoda sudhaar aaya. Uski aankhon ki dundhli roshni ab saaf ho chuki thi aur zakhm dheere-dheere sukh rahe the.

Ek subah, Bistar ke paas wale table par kisi mehmaan ka choda hua purana newspaper pada tha. Riya ne dheere se apna jala hua haath aage badhaya aur akhbar ko utha liya. Jaise hi uski nazar local crime news ke page par gayi, uske jism ka khoon jam gaya.

Headlines mein unke ghar ki tasveer thi aur niche saaf likha tha:

“Rajpur Road Parcel Bomb Case: Dulhe Sameer Rawat Aur Dadi Devki Devi

Ki Maut, Police Ke Haath Ab Bhi Khaali.”

Akhbar Riya ke haath se chhoot kar gir gaya. Maano uski saans jaise rukne lagi ho, usne apne jale hue seene par haath rakha aur pure hospital ko sir par utha liya.

Woh zor-zor se rone aur chillane lagi. Jab uske Papa daudte hue andar aaye, toh Riya ne unka kurta pakad liya, “Aapne mujhe kyun nahi bataya?! Kyun jhoot bola mujhse?! Mujhe Sameer ke paas jaana hai! Mujhe kyun bachaya aapne?!”

Uska woh dardnaak rona, un jale hue zakhmon se dobara khoon ka risna, aur uska apne hi baap se ladna… Max Hospital ka har ek staff us din Riya ke is dard ko dekh kar ro pada.

Sach saamne aa chuka tha, aur is sach ne Riya ko andar se puri tarah maar diya tha.

Riya ke hosh mein aate hi Rajpur Police Station ke Inspectors ki team bayaan lene Max Hospital pahunch gayi. Par is baar, mahol mein ek ajeeb sa tanaav tha.

Dehradun ke baazar aur Rawat Estate ke aaspas ke padosi chori-chupe ajeeb baatein kar rahe the. Kuch logon ka kehna tha, “Dhamaka itna bada tha ki Sameer aur dadi khatam ho gaye, par Riya kaise bach gayi? Kahin iske piche koi aisi kahani toh nahi jo humein nahi pata?” Yeh ghinona shak aur psychological pressure Riya ke aaspas dheere-dheere badh raha tha.

Inspector ne jab Riya ke bed ke paas aakar recorder on kiya, toh unki aankhon mein bhi sawal the. Riya ne bikhri hui aawaz aur bahte aansuon ke saath us din ka ek ek second bayaan kiya.

​”Sameer ne chaku se tape kaata… andar hare rang ka gift box tha. Usme ek safed dhaaga nikal raha tha. Maine pucha ki yeh kya hai, aur jaise hi Sameer ne use kheencha… ek tez safed light chamki.

Mujhe bas itna hi yaad hai sir. Mujhe nahi pata woh kisne bheja tha… humne kisi ka kya bigada tha?” Riya ne rote hue apni statement puri ki. Uske bayaan mein koi jhoot nahi tha, sirf ek masoom tabaahi ka dastaan tha.

Police ne ab Riya ke gujre hue kal ka panna palatna shuru kiya. Riya ke purane doston aur rishte daaron se puch taach ke dauran ek aisi baat saamne aayi jiske baare mein kisi ko bilkul bhi nahi pata tha.

Shaadi se pehle, college ke dino mein, Riya ka ek boyfriend tha jiske sath uska kaafi purana aur gehra rishta tha, par kuch saal pehle unka break-up ho gaya tha.

Jab Police ne Ravindra Uncle aur Shalini Aunty se is baare mein pucha, toh unhone ek aisi baat batayi jismein police ko ek badi umeed nazar aayi.

​”Haan Inspector… shaadi se lagbhag 8 mahine pehle, Sameer ke Bangalore wale number par ek anjaan call aaya tha. Sameer ne mujhe bataya tha ki Riya ka ex-boyfriend bohot gusse mein tha. Woh phone par chilla raha tha aur ro raha tha, aur keh raha tha ki Riya ne use ek ameer ladke ke liye chodh diya.

Usne Sameer ko dhamki bhi di thi,” Ravindra Uncle ne haath jodte hue bataya.

Rajpur Police ne bina koi deri kiye Riya se uski info nikali aur us ex-boyfriend ko uske ghar se utha liya.

Use police station ke ek band kamre mein laya gaya, jahan interrogation mein Inspector ne us par sawalon ki bauchhar kar di.

​”Maine phone kiya tha sir, main maanta hoon!” woh ladka thand mein bhi paseena chodte hue chilaya. “Main gusse mein tha, mera dil toot chuka tha isliye maine Sameer ko dhamki di thi.

Par sir mujh par yakeen kijiye, maine koi parcel bomb nahi bheja! Mujhe toh yeh bhi nahi pata ki bomb banta kaise hai! Main toh paanch dinon se Dehradun mein hi nahi tha!”

Ladke ke is bayaan ko pakka karne ke liye police ne forensic team aur court ki ijazat se uska Lie Detector Test karwaya. Ladke ke jism par wires lagaye gaye, aur ghanton tak sawal puche gaye.

Par jab test ki final report aayi, toh Rajpur Police ke hosh ud gaye.

Aakhir asia kya tha report me? Aur kya Riya bhi apne boyfriend ke saath iss Murder me shamil hai?

Iss raaz ko jaane ke liye hamari website se bane rahe jiska khulasa agle aur final part me hoga

Final part Sabse Pehle Padhne Ke Liye abhi hamara WhatsApp channel join karein aur notifications on kar dein, taaki jab bhi agli kahani publish ho, aapko turant WhatsApp par notification mil jaaye!

English Thriller Readers Ke Liye Ek Khaas Suggestion:

Agar aapko Hindi ke saath-saath English mein bhi dark aur suspenseful stories padhne ka shauk hai, toh meri doosri website par is kahani ko zaroor try karein. Ye ek alag level ka experience degi!

“A Dead Crorepati, Missing ₹14 Lakhs, & A Cheap Nylon Rope? (Part 1)”

(Read in English)

ABOUT THE AUTHOR

Usama Deshmukh

Chief Author

Main Usama hoon, StoryQuirk ka Chief Author. Mera passion aisi deep aur darawni crime stories, berehmi se bhari murder mysteries, aur dark suspense thrillers likhna hai jo aakhir tak aapki saansein atka kar rakhein. Meri StoryQuirk ki duniya mein utar jaiye, aur inn mazedar crime aur suspense stories ka maza lijiye.